2022 සඳහා වන බුකර් සම්මානය දිනා ගැනීමට ශ්‍රී ලාංකික ලේඛක ශෙහාන් කරුණාතිලක ඊයේ (ඔක්. 17) සමත් විය.
2011 වසරේ සිය පළමු නවකතාව වන චයිනමන් (Chainaman – The Legend of Pradeep Mathew) හරහා ශෙහාන් කරුණාතිලක සාහිත්‍ය ක්ෂේත්‍රයට පිවිසියේ විචාරක පැසැසුමට ලක් වෙමිනි.
චයිනමන් (Chainaman – The Legend of Pradeep Mathew) ) කෘතිය, ක්‍රිකට් ක්‍රීඩාව විෂය කරගනිමින් ලියවුණු දෙවැනි හොඳ ම නවකතාව ලෙස පිළිගැනෙයි.
සාහිත්‍ය වෙනුවෙන් පිරිනැමෙන ඉහළම ජාත්‍යන්තර සම්මානය ලෙස සැලකෙන බුකර් සම්මානයට පාත්‍ර වූයේ ශෙහාන් කරුණාතිලකගේ දෙවැනි නවකතාව වන ‘සෙවන් මූන්ස් ඔෆ් මලී අල්මේදා’ (Seven moons of Mali Almeida) ය.
විනිසුරුවන් විසින් “එහි විෂය පථයේ අභිලාෂය සහ එහි ආඛ්‍යාන ශිල්පීය ක්‍රමවල හාස්‍යජනක නිර්භීතභාවය” අගය කරන ලද බව විදෙස් මාධ්‍ය වාර්තාවල දැක්වේ.
Seven Moons of Mali Almeidaහි මරණයෙන් නැවත පිබිදෙන ඡායාරූප ශිල්පියෙකු පිළිබඳ ලියැවී තිබේ.
ඔහුව මරා දැමුවේ කවුරුන් ද යන්න ගැන කිසිදු අදහසක් නොමැතිව, මාලිට ඔහු වඩාත් ම ආදරය කරන පුද්ගලයින් සම්බන්ධ කර ගැනීමටත් සහ ඔවුන්ව ශ්‍රී ලංකාවේ සිවිල් යුද්ධයේ ම්ලේච්ඡත්වයේ සැඟවුණු ඡායාරූප ගබඩාවකට ගෙන යාමට ඇති කාලය පිළිබඳව එහි සඳහන් වී ඇත.
එය “ජීවිතය සහ මරණය හරහා රෝලර්කෝස්ටර් ගමනක පාඨකයා රැගෙන යන නවකතාවක්,” බවට මෙම වසරේ ත්‍යාගය සඳහා විනිසුරුවන්ගේ සභාපති නීල් මැක්ග්‍රෙගර් ප්‍රකාශ කර තිබේ.
සිය ත්‍යාගය ලබා ගනිමින් සිංහල භාෂාවෙන් සහ දමිළ භාෂාවෙන් ශ්‍රී ලාංකේය ජනතාව අමතමින් ශෙහාන් කරුණාතිලක ප්‍රකාශ කර ඇත්තේ, “මම පොත් ලියන්නේ ඔබ වෙනුවෙන්… අපි මේ කතා බෙදාහදා ගනිමු,” යනුවෙනි.
වෘත්තීය ලේඛකයකු වන ශෙහාන් කරුණාතිලක 1975 වසරේ ගාල්ල නගරයේදී උපත ලැබුවෙකි. කොළඹ හැදී වැඩුණු ඔහු වැඩි දුර අධ්‍යාපනය හදාරා ඇත්තේ නවසීලන්තයේය.
ජනමාධ්‍යවේදියකු ද ශෙහාන් කරුණාතිලක ලේඛන කලාවට පිවිසීමට පෙර, දැන්වීම්කරණ ක්ෂේත්‍රයේ රැකියාව කළේය. ශෙහාන් කරුණාතිලක ළමා පොත් රචකයකු, තිරපිටපත් රචකයකු මෙන්ම ගීත පද රචකයකු ද වෙයි.
ඔහු සුප්‍රසිද්ධ The Guardian, Newsweek, Rolling Stone, GQ, National Geographic, Conde Nast, Wisden, The Cricketer සහ the Economic Times ආදී සගරාවලට ලිපි සම්පාදනය කරයි.
මයිකල් ඔන්ඩච්චි
ශ්‍රී ලංකාවේ උපත ලැබු ලේඛකයකුට බුකර් සම්මානය හිමිවුණු දෙවැනි අවස්ථාව මෙයයි. මීට පෙර බුකර් සම්මානයෙන් පිදුම් ලැබුවේ මයිකල් ඔන්ඩච්චිය. ඒ,1992 වසරේ ‘ඉංග්ලිෂ් පේෂන්ට්’ (The English Patient) කෘතිය වෙනුවෙනි.
